1Jo 5 | AEY | STEP | Dana cunug age Jisas uqa Krais ec wawaga meleena eu age Anutna mel ibuldoin. Odocob cunug age memegnu nalug megina eu age melahnuha nalug megina.

1 John 5

Ege wawige meleec dana, ege mahana gagadic odoc wooldom

1 Dana cunug age Jisas uqa Krais ec wawaga meleena eu age Anutna mel ibuldoin. Odocob cunug age memegnu nalug megina eu age melahnuha nalug megina. ^{▼▼(5.1)Age je 1 Jon 2.22ca, 4.2ca euna nijia eu feiga.} 2 Ege Anutnu nalug memeb uqana loo je toodu odoqona. Ege euna Anutna melnu nalunuga moqona ec doqona. 3 Ge, Anutna nalug mec eu odi. Ege uqana je gagadic eu toodu odeqan. Odocob Anutna mel ibuldoin eu age mahana gagadic odoc wooldogina. Eunu Anutna je gagadic eu culumen qee igina. Ege Anutnu wawige meleena. Odocob kobol euna ege mahana gagadic odoc wooldoqona.

Anut uqa Melahnu je camasac maden

5 Inni uqa maha wooldona? Oso uqa Jisas uqa Anut Melah ec waug meleena eu uqadih maha wooldona. ^{▼▼(5.5)Age je 1 Jon 4.2na nijia eu feiga.} 6 Jisas Krais uqa wa joudecnaca, na babalecna golac basecdocob necnaca hon. ^{▼▼(5.6)Grik je eu Jisas Krais uqa wanaca, golacnaca hon eu himec maden. Euqa dana mati age wa eu uqana wa joudec, odocob golac eu na babalecna golac basecdocob nec ec cisdogina. Eunu ege odi falicdom.} Uqa wa joudecna himec qee hol qa uqa humei wa joudec umei na babalecna golac basecdocob nen. 7 Kis Gun uqa mele jena gug. Eunu Kis Gun uqa Jisas Kraisnu mele je qasali madena. 8 Jisas Kraisnu je qasali madec cijed nijeiga eu odi, eu Kis Gun, eu wa joudec, odocob eu na babalecna golac basecdocob nec. Odocob cijed i age je osol madegina.

9 Anutna je madec eu odi, uqa Melahnu je qasali maden. Eunu ege dana agena je madecnu wawige meleenafi eunu ege Anutna je madecnu wawige mele bahic ena. 10 Dana oso uqa Anut Melahnu waug meleena eu uqa je eu Anut qasali maden eu wele on, odocob je eu uqa waugna nijia. Dana oso uqa Anutnu waug qee meleena eu uqa Anut uqa Melahnu je qasali maden ec qee waug meleel. Eunu dana eu uqa Anut eu uhulec dana ec maden. 11 Odocob Anutna qasali madec je eu odi. Anut uqa ege cebac bilec catanec igen, odocob cebac bilec catanec eu uqa Melahna bilia. 12 Dana uqa Melahca gabandoc bilina eu uqa cebac bilec catanec eu wele on. Odocob dana uqa Melahca gabandoc qee bilina eu uqa cebac bilec catanec eu qee ol.

Ege cebac bilec catanec wele om

13 Ija age Anut Melah ijannu wawaga meleena eu age cebac bilec catanec wele oin ec doqagannu je i jaqiadigina. 14 Odocob ege Anut cemenug limeb inondocnu majanige gecca qee ihoc tawoqona. Eunu ege uqana cisdoc toodumeb ceteh osonu sisildocomunfi uqa egena je dah mena. 15 Odocob ege ceteh osonu sisildocomun uqa egena je dah mena ec doqonafi ege ceteh osonu sisildom eu wele om echa doqona.

16 Dana oso uqa waug meleec cotig oso silail memeb fecebfi, odocob silail mec eu qocob cal mecnu ihoc qeefi, dana eu uqa cotig Anutnu inondutoiale, odocob Anut uqa cotig eu cebac bilec utigian. Anut uqa dana eundec agena silail mec eu qocob cal mecnu ihoc qee himec cebac bilec utina. Euqa silail mec oso nijia eu qocob cal mecnu ihoc. Ija age dana uqa silail eundec mennu inondoiga ec qee maadigina. 17 Cahuldoc cunug eu silail qa silail oso eu qocob cal mecnu ihoc qee nijel. ^{▼▼(5.17)Grik je ina gug eu camasac qee. Euqa doc dana leih age odi cisdogina. Uhulec je hahun madec dana leih age Jisas uqa Krais qee ec madein. (Age je 4.2na nijia eu feiga.) Eunu age Jisas Kraisnu wawaga meleecnu ihoc qee. Odocob Anut uqa cahahaadecnu ihoc qee. Odocob agena silailnu oloqanih jana loqagan. Euqa dana uqa silail oso odona uqa Jisas Kraisnu waug meleecnu ihoc. Odocob Anut uqa cahahadocnu ihoc.}

18 Ege doqona, Anutna mel ibuldoin oso silail mimi qee bilina. Euqa Anut Melah uqa mel eu me biligiannu cofdona. Odocob Seten uqa mel eu me qee oso qee odudiaun. 19 Ege doqona, ege Anutna mel biluquna, odocob maha i cunug Setenna gagadic odoc cofdona.

20 Odocob ege doqona, Anut Melah uqa humei Mele Anut docnu cisdoc silec igen. Ege Mele Anutca gabandoc biluquna, odocob ege Anut Melah, Jisas Krais uqaca gabandoc biluquna. Jisas Krais uqa Mele Anut, uqa cebac bilec catanec uqana gug.

21 O ijana mel sim, age kadan tibud qisacadeiga!